کشور چین چهارصد هزار دوز واکسین کرونا به افغانستان کمک می‌کند

۱۰ حوت ۱۳۹۹

وزارت صحت عامه می‌گوید وانگ یو سفیر کشور چین، امروز در دیداری با داکتر وحید مجروح سرپرست وزارت صحت عامه، از کمک دوصدهزار دوز دیگر واکسین کرونا به دولت افغانستان خبر داد.
وزارت صحت عامه، امروز ( یک‌شنبه، ۱۰ حوت) در اعلامیه‌ای می‌گوید که آقای یو، در نشست قبلی که با سرپرست وزارت صحت عامه داشت دوصدهزار دوز واکسین کرونا از سوی این کشور به دولت افغانستان وعده کمک داده بود که دوصدهزار دوز دیگر نظر به تقاضای وزارت صحت عامه از سوی این کشور به آن افزوده شده است و مجموعه مقدار واکسین کمک شده از سوی این کشور به چهارصد هزار دوز رسیده است.
در این اعلامیه آمده‌است که داکتر وحید مجروح سرپرست وزارت صحت عامه، از این کمک کشور چین قدردانی نموده و واکسین کرونا را یکی از نیازهای مهم سکتور صحت در مهار ویروس کرونا خواند.
هم‌چنان این اعلامیه می‌افزاید که سرپرست وزارت صحت عامه، از سفیر کشور چین خواست تا وزارت صحت عامه را در راستای فعال سازی دستگاه های طبی شفاخانه جمهوریت همکاری نیز نماید.
گفتنی است که پیش از این کشور هند ۵۰۰ هزار دوز واکسین کرونا را به کشور افغانستان کمک کرده بود.
اشتراک گذاري با دوستان :

Comments are closed.