افغان حکومت د پاکستان هغو وړاندیزونو ته مثبت ځواب ویلای چې په ترڅ کې یې د څلور اړخیزو مزاکراتو میکانیزم بیا پیلېږی.
د افغانستان د ملی امنیت د شورا دفتر وایی، افغانستان په لوړه کچه په هغې غونډه کې ګډون کوی چې د دغه هېواد د سولې په تړاو په عمان کې جوړېږی.
د دغې شورا د دفتر ویاند قادر شاه د یکشنبې په ورځ ازادی راډیو ته وویل، حکومت د پاکستان هغو وړاندیزونو ته مثبت ځواب ویلای چې هغه هېواد د څلور اړخیزو غونډو د بیا پیلېدو په اړه یې درلودل.
ښاغلی قادر شاه وایی، دا غونډه په نېږدې راتلونکی کې د افغانستان او پاکستان تر منځ جوړېږی چې چین او امریکا پکې د څار رول لری.
ښاغلی قادر شاه وویل:
«وروستیو تحولاتو ته په پام سره، د افغانستان اسلامی جمهوریت د پاکستان هغو وړاندیزونو ته مثبت ځواب ویلای چې د هغې په ترڅ کې د څلور اړخیزو مذاکراتو میکانیزم بیا پیلېږی، دغهناسته به په نېږدې راتلونکی کې په عمان کې جوړه شی چې په هغې کې د افغانستان او پاکستان لوری ګډون کوی او امریکا او چین پکې نظارتی رول ادا کوی.»
نوموړی وایی چې په دې غونډه کې به اهداف تعینېږی، تعین شویو اهدافو ته د رسېدو لارې چارې لټول کېږی او همدارنګه د همکاریو د ګډ میکانیزم په رامنځته کېدو هم خبرې کېږی.
د پاکستان د بهرنیو چارو وزیر خواجه اصف ویلی دا غونډه د روانې اکټوبر میاشتې په ۱۶ مه نیټه د عمان په مرکز مسقط کې جوړېږی.
که څه هم د ملی امنیت د شورا دفتر دا غونډه د څلور اړخیزو غونډو د لړۍ بیا پیل بولی، خو خواجه اصف ویلی چې په غونډه کې افغانستان، طالبان، پاکستان او امریکا ګډون کوی.
د افغانستان، پاکستان، متحده ایالتو او چین څلور اړخیزه همغږې ډلې له دې وړاندې د افغانستان د ستونزو د حل په خاطر، پنځه غونډې کړی، خو د دې غونډو لړۍ هغه وخت د افغان حکومت له خوا ودرول شوه چې پاکستان په عملی نه اقداماتو تورن شو.
شااوخوا یو کال وړاندې افغان حکومت وویل چې د دې غونډو دوام د وخت ضاېع کول دی او پاکستان ته ښیی چې په پخوانیو ژمنو وفا وکړی.
له دې سره د سیاسی چارو یو شمېر څېړونکی د دې هېواد دا هڅې او د اړیکو جوړولو ته لیوالتیا د پاکستان چل بولی او وایی چې په دې اړه تېرو تجربو ته په کتو باید نتیجو ته خوشبینه نه شو.
له ډلې شهزاده مسعود ازادی راډیو ته وویل:
«تاسې وګورئ، کله هم چې په پاکستان باندې نړیوال فشار زیات شی، بیا ورسره تګ او راتګ هم زیاتېږی او ورسره د سولې خبرې هم پیلېږی، زه دومره ویلای شم چې دا خبرې یوازې د وخت ضاېع کول او له خپله ځانه د نړیوالو فکر بدلول دی.»
دا په داسې حال کې ده چې ولسمشر غنی تل ویلی چې د افغانستان ثبات په دوه محورونو کې له پاکستان سره سوله او د افغانانو تر منځ په سوله کې لټوی.
ښاغلی مسعود وایی چې که څه هم افغانان د سولې هر غږ ته خوشحالېږی، خو افغان حکومت باید تېرو غونډو او تجربو ته په کتو ډېر هوښیارانه اقدامات وکړی او په دې برخه کې نور وخت ضاېع نه کړی.