ملګری ملتونه وایی چې په ۲۰۱۸ میلادی کال کې به درې میلیونه او درې لکه افغانان بېړنیو مرستو ته اړتیا لری.
په هغه راپور کې چې پرون دوشنبه «۱۳۹۶ کال د لیندۍ ۱۳» ملګرو ملتونو خپور کړ ویل شوی چې په افغانستان کې د جګړې له امله کورنی بې‌ځایه شوی او له ایران او پاکستانه ستنېدونکی افغانان مرستو ته ډېره اړتیا لری.
ملګرو ملتونو وویل، په افغانستان کې یوازې په اکټوبر کې د وسله‌والو طالبانو د جګړې له امله ۳۶۰ زره کسان بې‌کوره شوی دی.
لږ تر لږه نهه لکه افغانان د جګړې له امله بې‌کوره شوی.
د راپور په حواله، لږ تر لږه ۵۶۰ زره افغان کډوال له ایران او پاکستانه سږ کال خپل هېواد ته ستانه شوی چې په افغانستان کې د بېړنیو مرستو لپاره اړتیا یې لا زیاته کړې ده.
د ملګرو ملتونو د بشری مرستو د هماهنګۍ ادارې ویلی چې لږ تر لږه نهه لکه افغانان چې د جګړې له امله بې‌کوره شوی، په ناوړه وضعیت کې په کمپونو کې اوسی.
دا په داسې حال کې ده چې د کډوالو لپاره د ملګرو ملتونو د عالی کمېشنرۍ «یو. اېن، اېچ، سی، ار» د افغانستان د چارو مشرې، فتیحه عبدالله تېره اوونۍ د نړیوالې ټولنې د مرستې غوښتنه وکړه.
فتیحه عبدالله زیاته کړه:
««یو، اېن، اېچ، سی، ار» خیمې او د نورو موادو مرستې کوی، خو په دې برخه کې نړیوالې مرستې هم مهمې دی. موږ د افغانستان له حکومت سره مرستو ته متعهد یو او له نورو مرسته کوونکو ادارو مننه کوم.»
ملګری ملتونه وایی، ۴۰ فیصده کوچنیان د ودې لپاره لازم شرایط نه‌لری او په افغانستان کې د داسې ناروغیو له امله چې درملنه‌یې په اسانۍ ممکنه ده، د کوچنیانو د مړینې شمېره د نړۍ په کچه ډېره لوړه ده.
د ملګرو ملتونو د راپور په حواله، په افغانستان کې د روان میلادی کال په لومړیو نهو میاشتو کې لږ تر لږه ۲۴۸۰ کوچنیان د جګړې له امله وژل شوی او ۶۰ فیصده کوچنیان له روانې ناکرارۍ ځورېدلی، ځکه د کورنیو غړی یې وژل شوی یا په دوامدار ډول په وېره کې اوسی.
د ملګرو ملتونو په اټکل، د افغانستان د ۳۴ نیم میلیونه وګړو ۳۹ فیصده د فقر د کرښې لاندې ژوند کوی، ۱۰ میلیونه افغانان ابتدایی روغتیایی خدمات نه‌لری او نږدې دوه میلیونه افغانان په داسې سخت فقر کې چې حتی د خوراک لپاره څه نه‌شی موندلای، اوسی.
ملګرو ملتونو په خپله کلنۍ څېړنه کې چې سږ دوبی خپره شوه، افغانستان د هغو هېوادونو له ګڼې واېست چې جګړه په‌کې پای ته رسېدلې او د هغو هېوادونو په کتار کې یې شامل کړ چې جګړه په‌کې روانه ده.
ملګری ملتونه وایی، د افغانستان د وګړو تر نیمایی زیاته برخه چې ښایی ۱۴ میلیونه وګړی وی، په هغو ولسوالیو کې اوسېږی چې وسله‌والې نښتې په‌کې روانې دی او امنیت‌یې خراب دی.