د غزنی چارواکی وایی، وسله‎والو طالبانو د کابل-کندهار د لویې لارې پر امتداد، څو لوی او واړه پلونه الوزولی او پر پاخه سړک تګ راتګ‌یې بند کړی دی.
له دې امله د سیمې خلک، مسافر وړونکی موټر او د بار وړونکو موټرو چلوونکی مجبور دی چې له پاخه سړکه واوړی او په خامه لارو په هغو سیمو کې چې د وسله‎والو طالبانو په لاس کې دی، تګ راتګ وکړی.
په سیمه کې یو شمېر خلکو ازادی راډیو ته ویلی چې وسله‎وال طالبان له هغو خلکو چې د کابل-کندهار د لویې لارې د تخریبېدو له امله پر خامه لارو سفر ته مجبور دی، د مالیې په نوم پیسې هم اخلی.
وسله‌والو طالبانو تر اوسه په دې اړه څه نه‌دی ویلی.
وسله‎والو طالبانو د اندړو ولسوالۍ ته تللی سړک هم بند کړی دی.
د غزنی د والی ویاند، محمد عارف نوری وایی چې وسله‎والو طالبانو په قره‎باغ ولسوالۍ کې څو پلونه تخریب کړی او د کابل-کندهار سړک‌یې بند کړی دی.
عارف نوری وویل چې ډېر ژر به پوځی عملیات په سیمه کې پیل شی.
محمد عارف نوری زیاته کړه: «زموږ امنیتی ځواکونو احضارات پیل کړی او د ملی اردو نوی ځواکونه هم وراستول شوی او ډېر ژر به د دې سیمو او نورو ولسوالیو د پاکولو لپاره تصفیوی عملیات پیل شی.»
د غزنی د والی ویاند شنبه د اکټوبر ۶مه، ازادی راډیو ته وویل چې د غزنی او پکتیکا د سړک پر امتداد هم له څلورو ورځو راهیسې عملیات روان دی او امنیتی پوستې به هم ځای پر ځای شی.
غزنی د افغانستان یوازنی ولایت دی چې سږ کال به د ولسی جرګې انتخابات نه په‎کې کېږی.
وسله‎والو طالبانو د روان کال د اګسټ په ۱۰مه، پر غزنی ښار درنه حمله وکړه.
د ملګرو ملتونو د سازمان د اټکل له مخې، په هغې خونړۍ حمله کې ۲۰۰ تنه ملکی وګړی ووژل او زخمیان شول، د ښار لوی بازارونه وسوځېدل او خلکو ته ډېر مالی تاوان هم ورسېد.
د افغانستان د ملی دفاع وزارت پخوانی مرستیال ویاند، جنرال محمد رادمنش پرون له ازادی راډیو سره په مرکه کې وویل چې حکومت باید په غزنی کې د خلکو سیاسی او اقتصادی وضعیت ته زیات پام کړی وی او دا ولایت‌یې له داسې کمزوری حالته ژغورلی وی.
نوموړی وایی: «دولت په‎دې برخه کې کمزورتیاوې لری، دفاع وزارت، د کورنیو چارو وزارت په کار کې نیمګړتیا ده، دولت نه‌دی توانېدلی چې خلکو ته کارونه پیدا کړی چې له امله‌یې په غزنی کې فقر دوه برابر زیات کړی دی. هغه پروګرامونه چې له غزنی سره‌یې ژمنه شوې وه، باید عملی شی که نه، شعاری مسایل هېڅ ستونزه نه‎شی حل کولای او وضعیت لا خرابېدلای شی.»
د افغانستان جمهور رییس غزنی ته په وروستی سفر کې له خلکو سره ژمنه وکړه چې غزنی به له اداری اړخه د لومړۍ درجې ولایتونو کې وګڼل شی او امنیتی کمربندونه به‌یې ټینګ شی.
د روېټرز خبری اژانس په حواله، د غزنی پر ښار د وسله‎والو طالبانو تر حملې وروسته ولسمشر غنی ژمنه کړې وه چې ۲۰ میلیونه ډالر به د غزنی د ښار له بیارغونې او له خلکو سره د مرستې لپاره مصرف کړی.
د غزنی له ۱۸ ولسوالیو څخه ټولې په بشپړ ډول یا قسماً د وسله‎والو طالبانو په لاس کې دی.
غزنی په ۲۰۱۳ میلادی کال کې د اسلامی نړۍ د ثقافت مرکز بلل شوی و.