ظاهر قدیر: امریکا نوې ستراتیژۍ کې د سولې پرځای د جنګ دوام ته ځای ورکړی

شنبه 4 سنبله 1396/

mandegar-3د ولسی جرګې وکیل ظاهر قدیر د امریکا پر نوې اعلان شوې ستراتیژۍ انتقاد وکړ چې د سولې پرځای په کې د جنګ دوام شوی.
نوموړی دا څرګندونې د جمعې په ورځ په ننګرهار کې د مشرقی شورا له‎خوا جوړې شوې غونډې ته وکړې چې په زرګونو کسانو په کې برخه اخېستې وه.
ظاهر قدیر په خپلو خبرو کې د امریکا له‎خوا پر نوې اعلان شوې ستراتیژۍ نیوکه وکړه او ټینګار یې وکړ چې داعش سره دې جګړه وشی خو طالب سره دې سوله:
“دې ستراتیژۍ کې د جنګ دوام ته ډېر زیات ځای ورکړل شوی مګر سولې ته هېڅ ځای نه‎دی ورکړل شوی، موږ جنګ غواړو خو د داعش سره ښه په کلکه ځکه هغوی سره د سولې هېڅ جواز نشته خو طالبانو سره سوله وکړئ، که د حکومت او نړیوالې ټولنې زور نه رسیږی، ولس دې ته تیار دی زه دې ته تیار یم چې طالبانو سره خبرې وکړم. ”
ښاغلی قدیر په خپلو خبرو کې هغه اوازې په کلکه رد کړې چې ګوندې دی د کوم سیاسی ائتلاف په ملاتړ لګیا دی.
نوموړی وویل، دی د هېڅ ائتلاف سره نه‎دی او یوازې د ولس د حق غوښتنې په خاطر یې ولسی حرکت پیل کړی:
“زه د دې ولس استازی یم، د کوم شخص استازی نه یم او نه د کوم سیاسی ګوند سړی یم او نه مې کومې سیاسی ډلې نه تراوسه ملاتړ اعلان کړی. ”
په دې غونډه کې د نورو ځوانانو او قومی مشرانو تر څنګ د ننګرهار پوهنتون د انجنیری پوهنځی استاد شاکر فاروقی وویل، په اوسنی نظام کې ظلم، فساد، غصب او د قانون خلاف نورې کړنې اوج ته رسیدلی.
دی وایی، د دې ناخوالو پرضد به مدنی حرکتونه کوی او که اړتیا شوه د سر په قیمت هم مبارزې ته تیار دی:
“محصلین د دې ټولنې هغه ځوان قشر دی، سبا ډاکټر دی، قاضی دی، څارنوال دی، دوی ته توجه نه‎کېږی، ماسټری نشته،تعلیمی بورسونه نشته دوی مجبور دی مدنی حرکتونه به کوی مجبور دی غره ته به خیژی زما وژل که دلته کوی سبا غره کې وکړه د هېچا پروا نه‎لرم. ”
د غونډې نورو برخه‎والو هم په خپلو خبرو کې پر افغان حکومت نیوکه وکړه چې د مشرقی خلکو پر حق یې سترګې پټې کړی او ګواښ یې وکړ که چیرې د ختیځې سیمې ولسونو ته حق ورنه‎کړل شی دوی به پراخو مدنی حرکتونو ته دوام ورکړی.

اشتراک گذاري با دوستان :

Comments are closed.