هیأتی متشکل از مقامات عالی‌رتبه افغانستان در دیدار با رییس‌جمهور تاجیکستان مسایل مربوط به طرح ایجاد راه‌آهن ترکمنستان-افغانستان-تاجیکستان را بررسی کردند.
بنابر بیانیه دفتر مطبوعاتی ریاست جمهوری تاجیکستان، این هیأت افغانی به رهبری عمر زاخیلوال وزیر مالیۀ افغانستان در مذاکرات با امامعلی رحمان موضوعات مربوط به زمینه‌های تطبیق اسناد همکاری‌های دوجانبه و منطقه‌یی ۲ کشور در بخش‌های توسعه اقتصادی و تجاری، سرمایه‌گذاری، انرژی و حمل‌ونقل را مورد بحث و گفت‌وگو قرار داد.
به گفته این منبع، طرفین در این دیدار در مورد تهیه و امضای توافق‌نامه سه‌جانبه تجاری و ترانزیتی بین تاجیکستان، افغانستان و پاکستان، تنظیم اسناد منطقه‌یی برای ساخت خطوط فشار قوی انتقال برق CASA-1000، راه‌آهن تاجیکستان–افغانستان–ترکمنستان و افتتاح گذرگاه‌های جدید در مرز مشترک دو کشور، تبادل‌نظر کردند. در این بیانیه تصریح شده است
که هیأت افغانی در ملاقات با رییس جمهور تاجیکستان همچنین مسایل دیگر به‌خصوص انتخاب محل و مشخص کردن مسیر راه‌آهنی که در آینده بین تاجیکستان، افغانستان و ترکمنستان احداث می‌شود، آموزش کادرهای راه‌آهن افغانستان در آموزشگاه‌های شهر دوشنبه و افزایش میزان انتقال انرژی برق تاجیکستان به افغانستان را بررسی و در خصوص اجرای اقداماتی در جهت تحقق این پیشنهادات توافق کردند.
هیأت افغانی متشکل از وزیر مالیه و وزیر، رییس اداره راه‌آهن و چندین مقام رسمی دیگر کشور روز پنجشنبه به منظور شرکت در همایش بین‌المللی بررسی مسایل آب وارد تاجیکستان شد.
جلسه اصلی این همایش با حضور هیأت‌هایی از حدود ۷۰ کشور و نماینده‌گان سازمان‌های بین‌المللی و منطقه‌یی دوشنبه آینده برگزار خواهد شد.