د افغانستان د جمهوری ریاست او د جمعیت اسلامی ګوند ترمنځ د خبرو په دوام یوه باوری سرچینه وایی، دواړه خواوې پر ځینو مسائلو توافق ته رسېدلی دی.
سرچینه چې نه غواړی د موضوع د محرمیت له کبله یې نوم یاد شی ازادی راډیو ته وویل چې که څه هم پرمختګونه ډېر ورو دی، خو نتیجو ته هیله مندی شته.
یادې سرچینې د اساسی قانون د تعدیل لپاره د یوه ځانګړی کمېسیون تشکل یو له هغو مواردو څخه یاد کړ چې توافق پرې شوی دی.
اخوا د جمعیت اسلامی ګوند د رهبرۍ شورا غړی محمد اسماعیل خان وایی چې حکومت تراوسه د جمعیت ګوند یوه غوښتنه هم نه ده منلې.
ښاغلی اسماعیل خان د جمعې په ورځ«۱۳۹۶کال مرغومې۲۹» ازادی راډیو ته وویل چې د جمعیت او ارګ ترمنځ د خبرو لړۍ روانه ده خو هېڅ پرمختګ پکې نشته.
نوموړی زیاته کړه:
«د خبرو ور پرانیستی دی، خو تر اوسه مذاکرو هېڅ نتیجه نه ده ورکړې، هغه موارد چې د جمعیت ګوند حکومت ته وړاندې کړی حکومت یې نه منی.»
جمعیت اسلامی ګوند د بلخ د ولایت له مقامه د عطا محمد نور د لېرې کېدو په بدل کې حکومت ته ځینې وړاندیزونه کړی دی.
له تېرې اوونۍ راهیسې د ارګ او جمعیت ګوند پیل شوې مذاکرې څه نتیجه لری؟
د اساسی او د انتخاباتو په قوانیونو کې د تعدیلاتو رامنځته کېدل، په بلخ کې د جمعیت ګوند په خوښه د والی او امنیه قوماندان ګمارنه، د سیاسی احزابو په خوښه بیا ځلې د انتخاباتی کمېسیونونو لپاره د غړیو ګمارنه او په خپل وخت د ولسی جرګې او ولسوالیو شورا ګانو د انتخاباتو ترسره کول د جمعیت ګوند مهم وړاندیزونه دی.
دا په داسې حال کې ده چې تېره ورځ په کابل کې د امریکا سفیر جان باس بیا وویل چې ژر تر ژره باید په بلخ کې له سوله ییزې لارې واک انتقال شی.
د سیاسی چارو یوشمېر کارپوهان بیا وایی، دا چې حکومت د توافق له مخې رامنځته شوی نو په بشپړه توګه د اساسی قانون عملی کول ښایی اسانه نه وی.
له ډلې یې اسدالله میلاد ازادی راډیو ته وویل:
«هغه حکومتونه چې د بهرنیو عواملو په نتیجه کې رامنځته شوی وی دا ډول کړکېچونه پکې وی او د مرکزی حکومت سره د سیمه ییزو ادارو لانجې طبیعی امر دی خو که چېرته یې نظریات تر یو بریده په پام کې ونیول شی زه فکر کوم دغه ستونزه حل کېدای شی.»
د ښاغلی مېلاد په خبره د روانې سیاسی لانجې د حل لپاره د دواړو خواوو په دریځونو کې نرمښت مهم دی او په ورته وخت کې حکومت هم باید په بلخ کې د رهبرۍ د بدلون لپاره هغوی ته چې له دې اړخه اندېښنې لری واضح او قناعت ورکونکی ځواب ووایی.
خو خپله ارګ تر دا مهاله په دې اړه رسماً څه نه دی ویلی.