رییس جمهور کرزی به دعوت مقامات تاجیک، هفتۀ جاری به دوشنبه سفر خواهد کرد.
بر اساس بیانیه منتشر شده توسط دفتر مطبوعاتی وزارت امور خارجه تاجیکستان، حامد کرزی رییس جمهور افغانستان دوشنبه هفته جاری به تاجیکستان سفر می‌کند.
بازدید رسمی کرزی از تاجیکستان به دعوت مقامات تاجیک و به منظور مذاکره در مورد مسایل و همکاری‌های دوجانبه در سطح عالی انجام خواهد شد.
در چارچوب برنامه این بازدید و پس از مذاکرات کرزی با امامعلی رحمان، رؤسای جمهوری افغانستان و تاجیکستان در کاخ ملت چند موافقتنامه دوجانبه را نیز امضا خواهند کرد.
دفتر مطبوعاتی وزارت امور خارجه تاجیکستان در این بیانیه تصریح کرده است که، رؤسای جمهوری دو کشور در زمینه مسایل دوجانبه، تأمین امنیت منطقه‌یی، توسعه همکاری‌های دو کشور در بخش اقتصادی، تجارت، ترانزیت کالا و ارایه خدمات همچنین تقویت روابط نهادهای انتظامی گفت‌وگو خواهند کرد.
از زمان زمامداری کرزی، این ششمین سفر او به تاجیکستان است.
کارشناسان معتقدند: با توجه به مرز مشترک دو کشور که به حدود ۱۴۰۰ کیلومترمی‌رسد، مسائل امنیت مرزی و تقویت تدابیر حفاظتی در امتداد مرزها، می‌تواند از محورهای مذاکرات رؤسای جمهور دو کشور باشد.
به گفته این کارشناسان، اجرای طرح‌های مشترک در زمینه توسعه اقتصادی و ارتباطات، از جمله احداث یک شبکه‌ قوی انتقال برق از تاجیکستان به افغانستان و از همین طریق به پاکستان و همچنین بررسی و تدوین تدابیر مربوط به اجرای طرح ساخت راه آهن «ترکمنستان- افغانستان- تاجیکستان» نیز از دیگر مسائل مورد بحث در دیدار رؤسای جمهور افغانستان و تاجیکستان در دوشنبه خواهد بود.