پس از حملات تروریستی به کنسولگری‌های هند و پاکستان و افزایش ناامنی و بی‌ثباتی در شمال افغانستان، تاجیکستان دو کنسولگری خود در ولایت‌های بدخشان و کندز را به صورت موقت بست.
سفارت تاجیکستان با ارسال نامه‌یی‌ رسمی به وزارت امور خارجه افغانستان اعلام کرد که به دلیل ناامنی‌ها در شمال افغانستان، این کشور کنسولگری‌های خود در ولایت‌های بدخشان و کندز را به صورت موقت تعطیل می‌کند.
همچنین قرار بود تاجیکستان فعالیت‌های کنسولگری خود در شهر مزارشریف را هم به حالت تعلیق در آورد اما مقامات محلی ولایت بلخ به آنان اطمینان دادند که امنیت این نهاد سیاسی را تأمین می‌کنند.
گفته می‌شود که مقامات تاجیکستان پس از حمله به کنسولگری‌های هند و پاکستان در شهرهای مزارشریف و جلال‌آباد، تصمیم به بستن دو کنسولگری خود در ولایت‌های بدخشان و کندز را گرفته‌ است.
وزارت امور خارجه افغانستان ضمن تایید این خبر گفت: تاجیکستان به علت ناامنی دو کنسولگری خود را بسته است اما این اقدام تاثیری بر روابط کابل و دوشنبه نخواهد گذاشت.
خیرالله آزاد معاون سخنگوی وزارت امورخارجه افغانستان این اقدام تاجیکستان را موقتی بیان کرد.
سید عبدالهادی هدایت رییس بنیاد دعوت اسلامی علمای افغانستان در این مورد گفت: تاجیکستان کنسولگری‌های خود در بدخشان و کندز را بست؛ اما عطا محمد نور سرپرست ولایت بلخ مانع بسته شدن کنسولگری این کشور در مزار شریف شد و به مقامات این کشور اطمینان داد تا امنیت آن را به طور کامل تامین کند.
والی بدخشان گفت: مقامات تاجیکستانی ناامنی را دلیل اصلی بسته‌شدن کنسولگری کشورشان در این ولایت می‌دانند.
نصرالله استانکزی استاد دانشگاه گفت: ممکن است هدف تاجیکستان از این اقدام این باشد تا اعتراض خود را در برابر حکومت افغانستان به دلیل افزایش ناامنی نشان بدهد.
چندی پیش دو حمله تروریستی به کنسولگری‌های هند در مزارشریف و پاکستان در جلال‌آباد صورت گرفت که تلفاتی بر جای گذاشت.