مقامات دولتی تاجیکستان اعلام کردند که شمار نیرو در مرز با افغانستان را برای جلوگیری از تهدیدات امنیتی، بیشتر کرده اند.
مقامات دولتی این کشور گفته اند، کشورش همچنان ده ها پاسگاه امنیتی را در مرز با افغانستان به زودی ایجاد می کند.
محمد الُغ خودژایف، سخنگوی پولیس سرحدی تاجیکستان می‌گوید که این اقدام به دنبال افزایش تهدیدات امنیتی از سوی تروریستان، فعالیت قاچاقبران اسلحه و اختطاف‌چیان صورت می‌گیرد.
او افزوده که برای جلوگیری از تهدیدات، کشورش نیروی بیشتر در نزدیکی مرز با افغانستان مستقر کرده، اما وی در مورد تعداد این نیروها جزییات نداده است.
مقامات تاجیکستان می‌گویند که ادامه جنگ در شمال افغانستان تهدیدات امنیتی در این کشور را بیشتر کرده است.
گفته می‌شود که تاجیکستان پس از افزایش ناامنی در شمال افغانستان و قندوز همرز این کشور، به امنیت مناطق مرزی با افغانستان تمرکز بیشتر کرده است.
تاجیکستان سال گذشته نیز پس از درگیری گروهی از مهاجمان با پولیس سرحدی این کشور در مرز با افغانستان، تدابیر امنیتی در نواحی مرزی دو کشور را تشدید کرده بود.
همچنان پیشتر روسیه و تاجیکستان مانور نظامی مشترک شامل هزار زره پوش، دستگاه‌های توپ‌خانه و ۲۳ طیارۀ جنگی برای جلوگیری از تهدیدات در این کشور برگزار کردند.