تیم ملی فوتبال کشور در نخستین دیدارش در چارچوب مرحلۀ نهایی صعود به جام ملت‌های آسیا، روز سه شنبۀ هفتۀ جاری در شهر دوشنبۀ تاجیکستان میزبان ویتنام است.
تیم ملی فوتبال کشور پس از پایان اردوی تمرینی و کسب پیروزی برابر سنگاپور در قطر، شب گذشته وارد شهر دوشنبه پایتخت تاجیکستان شد.
به دلیل تأخیر در پروازهای فلای‌دبی از دوحه به دبی و از دبی به دوشنبه، ملی‌پوشان ساعت‌های زیادی را در فرودگاه دوحه و دبی سپری کردند و سفر طولانی و خسته کننده برای رسیدن به تاجیکستان داشتند.
سید علی‌رضا آقازاده، دبیرکل فدراسیون فوتبال افغانستان نیز در فرودگاه دوشنبه به استقبال تیم ملی آمد. ملی‌پوشان هم اکنون در هوتل محل اقامت‌شان در شهر دوشنبه حضور دارند.