اجرائیه ریاست وایی، د ملی یووالی حکومت د مشرانو تر منځ د وروستیو اختلافاتو د هوارۍ د هڅو په دوام، ټاکل شوې ده ولسمشر او اجرائیه رییس راتلونکې پنجشنبې له یو بل سره وګوری.
د اجرائیه ریاست مرستیال ویاند جاوید فیصل د سې شنبې په ورځ ازادی راډیو ته وویل چې په دغه لیدنه کې به ولسمشر د سیاسی هوکړه لیک په اړه خپل نظر له اجرائیه رییس سره شریک کړی.
ښاغلی فیصل زیاتوی: “په ټوله کې د سیاسی هوکړه‎لیک تطبیق، د انتخاباتو د نظام اصلاح، د انتخاباتو داېرېدو او لویې جرګې جوړېدو ته زمینه برابروی. نه یوازې دا چې پر دې برخو موږ پرمختګ کوو، بلکې د سیاسی هوکړه لیک او د خلکو له غوښتنو سره سم مخته ځو.”
ښاغلی فیصل وایی، دواړه مشران به درېیمه ناسته هم ولری چې د درې واړه غونډو د نتیجې موندنې ناسته به وی، خو د درېیمې ناستې د وخت په اړه یې معلومات ورنه‎کړل.
د حکومت د مشرانو تر منځ اختلافات وروسته له هغې راڅرګند شول چې اجرائیه رییس عبدالله عبدالله د ځوانانو یوې غونډې ته د وینا پر مهال پر ولسمشر انتقاد وکړ او جمهوری ریاست بیا د ښاغلی عبدالله خبرې د حکومتدارۍ د موازینو خلاف وبللې.
د حکومتی مشرانو تر منځ اختلافاتو د خلکو او سیاسی کړیو تر منځ سختې اندېښنې را پیدا کړی دی.
سیاسی د احمد شاه مسعود د بنسټ مشر احمد ولی مسعود له ازادی راډیو سره په ځانګړې مرکه کې وویل چې د حکومتی مشرانو تر منځ اختلافاتو له نړیوالې ټولنې سره هم د دغه هېواد پر اړیکو منفی اغېزه کړې ده.
ښاغلی مسعود زیاته کړه: “په دې کې شک نشته چې د نړیوالې ټولنې حوصله تر وروستی بریده پای ته رسېدلې ده، یاده دې وی، پرته له څو هېوادونو چې په سیمه کې سټراټېژیکې ګټې لری، نور د افغانستان د مشرتابه پر وړاندې د ټولو هېوادونو حوصله پای ته رسېدلې ده.”
ښاغلی مسعود همدا راز سپارښتنه کوی چې حکومتی مشران دې له ټیمی ګټو تېر او د یوه واحد حکومت جوړېدو ته کار وکړی.
د سیاسی چارو بل کارپوه حشمت غنی احمدزی وایی، ولسمشر او اجرائیه رییس باید د اختلافاتو د لیرې کولو لپاره جدی هڅه وکړی.
ښاغلی احمدزی وایی، یوه توافق ته له رسېدو پرته به دواړه مشران په راتلونکو درېیو کلونو کې له ګڼو ستونزو سره مخامخ شی.