د افغانستان د ښځو چارو وزارت وایی، په دولتی ادارو کې ناسمو پالیسو او مقرریو د ښځو لپاره په کاری چاپیریال کې ستونزې پیدا کړی.
یاد وزارت دولتی ادارو کې د ناسمې پالیسۍ او مقرراتو ترڅنګ جنسی تبعیض، ناپوهی او د قانون سم نه پلې کېدل په کاری چاپیریال کې د ښځینه کارکوونکو په وړاندې د زورونې لوی لاملونه ګڼی.
د دغه وزارت مسؤلین وایی، د ښځو په وړاندې شته ستونزې دوامداره کار ته اړتیا لری او دوی د ستونزو د هواری لپاره جدی هڅې کوی.
د ښځو چارو وزارت وزیرې دلبر نظری د سې شنبې په ورځ په کابل کې د ښځو په اړه د یوه څیړنیز راپور د وړاندې کولو پر مهال وویل، په کاری چاپیریال کې ناسمې پالیسۍ او زورونې د ښځو په وړاندې لویې ننګونې دی.
نوموړې زیاته کړه:
“عمده ستونزې چې د ښځو په وړاندې یې زېږولی هغه د سمو پالیسو نشتون او پلی کېدل دی، په دولتی ادارو کې د ښځو زورونه موجوده ده چې له وجې یې کورنۍ خپلو لوڼو ته د کار اجازه نه ورکوی.”
نوموړې زیاته کړه چې دوی به له دغه راپوره یوه مقرره جوړه او ټولو دولتی ادارو ته به یې د پلی کېدو په هدف ولېږی.
اغلې نظری وایی، په ټوله کې۳۰ سلنه ښځې دولتی ادارو کې بوختې دی چې نهه سلنه یې د رهبرۍ په کچه دی.
په داسې حال کې چې د ښځو د حقونو د ټینګښت او د دوی د ستونزو د هواری په برخه کې حکومت او بېلابېلې موسسو له څو کلونو راهیسې د هڅو خبرې کوی خو لا هم ښځې د کار په ماحول کې د خوندیتوب احساس نه کوی او هغوی چې په کورونو کې دی هم ویل کېږی چې له لازمو حقونو نه دی برخمنې.
خو یو شمېر افغان څیړونکی وایی چې د افغانستان حکومت تر اوسه داسې اغېزمنې تګلارې نه لری چې له مخې یې د جنسی ځورونو مخنیوی وشی.
د دغو څېړونکو له ډلې حمیرا ثاقب وایی، افغان حکومت باید د جنسی ځورونې د مخنیوی لپاره داسې لارې چارې غوره کړی چې له مخې یې په افغان ټولنه کې د ښځو رول په بنسټیز ډول بدل شی.
بل خوا مدنی فعاله روشن څېړن د ښځو د حقونو د ټینګښت په برخه کې د ښځو چارو وزارت کړنې د قناعت وړ نه بولی او د ښځو په وړاندې د شته ستونزو د هواری په برخه کې د جدی اقداماتو غوښتنه کوی.
اغلې روشن زیاته کړه:
“دوی کارونه کړی خو دغه کارونه کافی نه دی، تاسو ګورئ چې تاوتریخوالی څومره ډېر دی،د وزګارتیا او د تعلیم ستونزو ته تاسو وګورئ په دې برخه کې څومره ستونزې موجودې دی، ماته د ښځو چارو وزارت کار د قناعت وړ نه ده.”
په افغانستان کې د ښځو د حقونو یو شمېر فعالانو او بنسټونو تل د ښځو د حقونو د ټینګښت په برخه کې د ښځو چارو وزارت ته د انتقاد ګوته نیولې خو نوموړی وزارت په تېره کې دا ویلی چې دا یو پالیسی سازه وزارت دی او تر خپل وسه یې په یاد برخه کې هڅې کړی دی.